اب یہ منظر خواب نہیں رہا کہ ایک شخص اپنے گھر کے ایک سادہ کمرے میں بیٹھ کر صرف ایک لیپ ٹاپ اور انٹرنیٹ کی مدد سے دنیا بھر تک پہنچ رہا ہو۔ ڈیجیٹل دنیا نے فاصلے سمیٹ دیے ہیں اور روزگار کے نئے دروازے کھول دیے ہیں۔ انہی میں سے ایک اہم دروازہ یوٹیوب آٹومیشن ہے جو کچھ عرصہ قبل سامنے آیا اور اب تیزی سے نوجوانوں کو محدود وسائل کے باوجود بڑے مواقع فراہم کر رہا ہے۔
آج کوئی شخص اگر درست حکمت عملی اور مصنوعی ذہانت کے ٹولز سے واقف ہو تو اکیلا ہی ایک مکمل میڈیا سیل کا کردار ادا کر سکتا ہے۔ یوٹیوب اس وقت دنیا کا دوسرا بڑا سرچ انجن ہے۔ ہر ماہ دو ارب سے زائد صارفین اس پلیٹ فارم پر سرگرم رہتے ہیں۔ روزانہ ایک ارب گھنٹے سے زیادہ ویڈیوز دیکھی جاتی ہیں۔ پاکستان میں انٹرنیٹ صارفین کی تعداد 12 کروڑ کے قریب پہنچ چکی ہے اور یوٹیوب یہاں سب سے زیادہ استعمال ہونے والی ایپلی کیشنز میں شامل ہے۔ یہ اعداد و شمار واضح کرتے ہیں کہ ویڈیو مواد کی مانگ کتنی وسیع ہے اور ایک معیاری چینل کے لیے کتنا بڑا میدان موجود ہے۔
یوٹیوب آٹومیشن کو عموماََ ٹیم ورک کے ساتھ منسلک کیا جاتا ہے مگر حقیقت یہ ہے کہ مصنوعی ذہانت نے اس ماڈل کو مزید سادہ بنا دیا ہے۔ آج ایک شخص اسکرپٹ رائٹنگ کے لیے اے آئی ٹولز سے مدد لے سکتا ہے، وائس اوور کے لیے مصنوعی آواز استعمال کر سکتا ہے، ویڈیو ایڈیٹنگ سافٹ ویئر کے ذریعے اسٹاک فوٹیج جوڑ سکتا ہے اور گرافک ڈیزائننگ کے آن لائن پلیٹ فارمز سے تھمب نیل تیار کر سکتا ہے۔ یوں وہ فرد جو کبھی وسائل کی کمی کے باعث پیچھے رہ جاتا تھا اب ایک کمرے میں بیٹھ کر عالمی سطح کا
مواد تیار کر سکتا ہے۔ یہی جدید یوٹیوب آٹومیشن ہے۔ کمائی کے حوالے سے دیکھا جائے تو یوٹیوب پارٹنر پروگرام میں شامل ہونے کے لیے ایک ہزار سبسکرائبرز اور چار ہزار واچ آورز درکار ہوتے ہیں۔ یہ ہدف بظاہر مشکل لگتا ہے لیکن اگر مواد کسی مخصوص نِش (Niche) پر مبنی ہو اور مستقل مزاجی کے ساتھ آپ لوڈ کیا جائے تو چند ماہ میں یہ سنگِ میل عبور ہو جاتا ہے۔ عالمی سطح پر اوسطا ایک ہزار ویوز پر ایک سے تین ڈالر تک آمدنی ہو سکتی ہے جبکہ امریکہ، کینیڈا یا یورپ جیسے ممالک کے ناظرین ہونے کی صورت میں یہ شرح زیادہ بھی ہو جاتی ہے۔
اگر کسی چینل کو ماہانہ دس لاکھ ویوز ملیں تو وہ خاطر خواہ آمدنی پیدا کر سکتا ہے اور یہ سب ایک لیپ ٹاپ سے ممکن ہے۔ مصنوعی ذہانت نے ویڈیو پروڈکشن کے اخراجات کم کر دیے ہیں۔ پہلے اسکرپٹ رائٹر، وائس اوور آرٹسٹ اور ایڈیٹر کی خدمات لینا پڑتی تھیں جس پر فی ویڈیو ہزاروں روپے خرچ ہوتے تھے۔ اب ایک شخص خود تحقیق کرکے اے آئی سے اسکرپٹ بہتر بنا سکتا ہے، مصنوعی آواز استعمال کر سکتا ہے اور فری یا کم لاگت والے سافٹ ویئر سے ویڈیو مکمل کر سکتا ہے۔ اس کا مطلب یہ نہیں کہ انسانی تخلیقیت غیر ضروری ہوگئی ہے، بلکہ اب اصل مقابلہ ہی آئیڈیاز، تحقیق اور مستقل مزاجی کا ہے۔
یہ بھی یاد رکھنا چاہیے کہ یوٹیوب آٹومیشن کوئی شارٹ کٹ نہیں۔ ابتدا میں ویوز کم آ سکتے ہیں، الگورتھم چینل کو فوراََ اوپر نہیں لاتا اور کئی بار محنت کے باوجود نتائج تاخیر سے ملتے ہیں۔ ڈیجیٹل مارکیٹنگ کے ماہرین کے مطابق کسی چینل کو مستحکم ہونے کے لیے کم از کم پچاس سے سو ویڈیوز درکار ہوتی ہیں تاکہ ڈیٹا جمع ہو اور یوٹیوب سسٹم اسے سنجیدہ سمجھے۔ اس مرحلے پر صبر سب سے بڑی سرمایہ کاری ہوتا ہے۔ پاکستان جیسے ملک میں جہاں نوجوانوں کی بڑی تعداد روایتی ملازمتوں کے محدود مواقع سے پریشان ہے وہاں ایک کمرہ اور ایک لیپ ٹاپ نئی امید بن سکتا ہے۔
یہ ماڈل صرف کمائی تک محدود نہیں بلکہ خود اعتمادی بھی پیدا کرتا ہے۔ کوئی شخص جب دیکھتا ہے کہ اس کی بنائی ہوئی ویڈیو کو دنیا بھر کے لوگ دیکھ رہے ہیں، اس پر تبصرے کر رہے ہیں اور اس سے سیکھ رہے ہیں تو یہ احساس بذات خود ایک بڑی کامیابی ہے۔ البتہ اس میدان میں ذمہ داری بھی لازم ہے۔ کاپی رائٹ قوانین کی پابندی، مستند معلومات کی فراہمی اور اخلاقی حدود کا خیال رکھنا ضروری ہے۔ مصنوعی ذہانت سے تیار کردہ مواد میں بھی انسانی نگرانی ناگزیر ہے تاکہ غلط معلومات یا غیر معیاری مواد ناظرین تک نہ پہنچے۔
یاد رکھیں کہ پائیدار کامیابی ہمیشہ اعتماد اور معیار سے جڑی ہوتی ہے۔ سچ یہ ہے کہ آنے والا دور ہنر اور ٹیکنالوجی کے امتزاج کا ہے۔ جو نوجوان مصنوعی ذہانت کو بطور آلہ استعمال کرنا سیکھ لیں گے وہ محدود وسائل کے باوجود غیر معمولی نتائج حاصل کر سکتے ہیں۔ یوٹیوب آٹومیشن اس بات کی زندہ مثال ہے کہ اب کاروبار کے لیے بڑے دفاتر یا بھاری سرمایہ ضروری نہیں۔ ایک سادہ کمرہ، ایک لیپ ٹاپ، مستقل مزاجی اور درست سمت ہی وہ چار عناصر ہیں جو کسی شخص کو ڈیجیٹل دنیا میں باوقار روزگار فراہم کر سکتے ہیں۔
وقت کا تقاضا ہے کہ ہم روایتی سوچ سے آگے بڑھیں اور ٹیکنالوجی کو دشمن نہیں بلکہ معاون سمجھیں۔ آج کا نوجوان اگر چاہے تو اپنے ہی کمرے کو اسٹوڈیو، اپنے لیپ ٹاپ کو دفتر اور اپنے خوابوں کو حقیقت میں بدل سکتا ہے۔ یہی یوٹیوب آٹومیشن ہے جو تیزی سے مستقبل کے روزگار کے طور پر سامنے آ رہا ہے۔
